Fagfólk innan Upplýst veitir eftirfarandi þjónustu eftir samkomulagi:

Fyrirlestrar (1 – 2 kennslustundir). Velja má um eftirfarandi efni:

• Hvað einkennir vísindi og hvað gervivísindi? Hver eru alvarleg viðvörunarmerki sem geta sagt manni strax að um gervivísindi sé að ræða?
• Hvað er satt og hvað er logið um bólusetningar? Hver er skaðinn af stríði gegn bólusetningum?
• Hver eru þekktustu gervivísindafögin og hvers vegna eru þau óvísindaleg?
• Hvernig notar maður grundvöll í rök- og þekkingarfræði til viðbótar við raunvísindi til að þekkja gervivísindi og heilsusvindl?
• Vísindalæsi. Hvað gerir vísindatilraunir og klínískar rannsóknir að traustum bakgrunni þekkingar? Hvað þýða helstu hugtökin í vísindagreinum og hvað aðskilur góða notkun þeirra frá slæmri?
• Vitrænn óheiðarleiki og vitræn misklíð. Hvernig spilar manngerð, gildismat og gagnrýnin hugsun inn í tilurð gervivísinda og heilsusvindls?

Efni fyrirlesturs má einnig ræða og finna út eftir áhuga og þörfum umbeiðenda.

Hver fyrirlestur inniheldur um 25 – 30 mínútur af framsögu og 10 – 15 mínútur af umræðu. Séu tímarnir 2 eða fleiri í röð er hægt að viðhafa annað skipulag eftir samkomulagi.

Umræðutímar. Panta má umræðu- eða rökræðutíma (40 – 60 mínútur) fyrir hópa með eða án notkunar dæma til umræðu um ofangreind efni fyrirlestra eða önnur tengd, eftir samkomulagi.  Æskilegt er að hópar í umræðum séu að lágmarki með 4 einstaklingum en að hámarki 30. Heppileg stærð er 6 – 12 manns.

Námskeið. Þau eru ekki komin á dagskrá eins og er. Þau verða tilkynnt hér og á forsíðu þegar þau verða sett í gang.

Í námskeiðum verður farið ítarlegar í gegnum vísindalæsi, fræðileg skilyrði þekkingar og muninn á þekkingu og blekkingu. Skoðuð verða dæmi um þekktustu gervifögin og farið yfir ástæður þess að þau standast ekki vísindalega skoðun. Ýmis áhrif gervivísinda á einstaklinga og samfélög verða kynnt og rædd. Séu námskeiðin fyrir ákveðna faghópa er skoðað hvernig gervivísindi snerta viðkomandi fög og vinnu fagfólks við þau. 

Gjöld. Föst verðskrá er ekki ákveðin í bili og verð fer eftir samkomulagi. Um er að ræða heilsutengda fræðslustarfsemi án álagningar virðisaukaskatts. Fyrirspurnir sendist á netfang okkar upplyst@upplyst.is